Monthly Archives: July 2012

ژیانی کەبوودوەند لە مەترسیدایە

ژیانی کەبوودوەند لە مەترسیدایە!

بەیاننامەی ژمارە ٤ :
کەبوودوەند ٤٦ رۆژە مانی لە خواردن گرتووەو لە خواردنی هەر چەشنە خواردەمەنی و وەرگرتنی دەرمانی پێویستی پزشکی دووریی کردووە.sedigh_kaboudvand.jpg
کەبوودوەند بە قامک دانان لە سەر کەمترین مافی یاسایی بەندکراوانی کورد، واتە مافی ” مەرەخەستی لە زیندان “، پاش تێپەڕبوونی ١|٢ ماوەی زیندانە بەسەردا داسەپاوەکەی (٥ ساڵ)، خوازیاری چاوپێکەوتن و پێڕاگەیشتن بە نەخۆشیی منداڵەکەیە.
کەبوودوەند پاش نووسینی لانیکەم ١٠ نامەی داواکاریی مەرەخەستی بۆ چارەسەری پزشکی خۆی و هەروەها چاوپێکەوتنی منداڵە نەخۆشەکەی “پژمان”؛ لە ٦ی جۆزەردانەوە مانی لە خواردن گرتووە. بە هۆی ئەم مانگرتنە درێژخایەنەوە، ماوەی دوو حەوتوویە کە گۆرچیلەکانیشی چڵکی کردووە و چەندین جار رەوانەی نەخۆشخانە کراوە.
تا ئێستاکە کەبوودوەند لە قبووڵکردنی راسپاردەی پزشکەکانی نەخۆشخانەو وەرگرتنی سۆرمی خوراکی دووریی کردووە.
کەمپێن و بنەماڵەی کەبوودوەند لە حەوتووی رابردووەوە داوایان لە بەرێزیان کردووە کە مانگرتنەکەی رابگرێت. لەم راستایەدا؛ تەنانەت ” پژمان”یش ئامادە بوو وێڕای دۆخی نالەباری تەندروستیی رۆژی ” دووشەممە ” بچێتە گرتووخانەو داوا لە باوکی بکات کە کۆتایی بە مانگرتنەکەی بێنێ. بەڵام رەوشی جەستەیی پژمان بە هۆی قەیرانی بوونەوە، مۆڵەت و ئیمکانی رۆیشتنی پێنەداوە.

پەریناز حەسەنی پاش چاوپێکەوتنی دوێنیی کەبوودوەند لە بەندیخانەی ئێڤین، دۆخی هاوژینی خۆیی زۆر مەترسیدار باس کرد و گوتی:” چاوەکانی کەبوودوەند کەوتۆتە چاڵا و بە توندی تووشی لاوازیی جەستەیی بۆتەوە”.
پشتیوانیی هەمەلایەنەی ناوەندەکان، چالاکڤانانی مەدەنی و سیاسی کورد و هاودەنگیی کۆمەڵە ئیرانییەکانی چالاک لە بواری مافەکانی مرۆڤ، لەم ماوەیەدا بەرچاوو بەرین بووە. داکۆکیکردن لە خواستەکانی محەمەد سدیق کەبوودوەند، چ لە نێوخۆو چ لە دەرەوەی کوردستان، لە لایەکەوە دەرخەری گرینگیی دامەزرێنەری رێکخراوی مافی مرۆڤی کوردستان لە لای خەڵکی ئەمەگناسە و لە سۆنگەیەکی دیکەوەش، هەوڵێکە لە پێناو ئاشکراکردنی هەڵاواردنی سیستماتیک و گوشاری چەند قاتی بۆ سەر زیندانیانی کورد لە نێو گرتووخانەکانی ئێراندا.
کەمپەینی پشتگیری لە کەبوودوەند؛ جارێکی دیکەش وێڕای جەختکردنەوە لە سەر داخوازییەکانی کەبوودوەند بۆ چاوپێکەوتنی منداڵەکەی و هەروەها مافی بەهرەمەندبوون لە مەرەخەستیی زیندان کە کەمترین داواکاریی زیندانییەکی سیاسی و مافێکی یاساییە؛ لە هەموو کەس و کەسایەتییەکان، کۆڕو کۆمەڵە مەدەنی و مافە مرۆڤییەکان، داوا دەکات کە لە رێگەی بەدواداچوونی خواستەکانی کەبوودوەند و هاودەنگی لە گەڵ بەرێزیاندا، هەڵسوکەوتی نایاسایی بەرپرسانی ئەمنییەتی و دادوەریی کۆماری ئیسلامی لەهەمبەر دامەزرێنەری رێکخراوی مافی مرۆڤی کوردستان و زیندانیە سیاسییەکانی دیکەی کورددا شەرمەزار بکەن.

کەمپێنی پشتگیری لە کەبوودوەند، ٢٠ی پووشپەڕی ١٣٩١ی هەتاوی

%d bloggers like this: