Blog Archives
به‌ره‌و پێشوازی سی ویه‌ك ساڵه‌ی تێرۆری ناجوامێرانه‌ی دۆكتۆر قاسملووی ڕێبه‌ر و هاوڕێیانی له ڤییه‌ن
به‌ره‌و پێشوازی سی ویه‌ك ساڵه‌ی تێرۆری ناجوامێرانه‌ی دۆكتۆر قاسملووی ڕێبه‌ر و هاوڕێیانی له ڤییه‌ن
ئاماده كردن و لێكۆڵینه‌وه : ئه‌مین خه‌واله
ڕۆژنامه‌نووس و هه‌واڵنێر
١١ی مانگى ٧ ی ٢٠٢٠
له كاتێكدا ۳۱ ساڵ به سه‌ر تێرۆری ڕیبه‌ری نه‌ته‌وه‌یی گه‌لی كورد له ڕۆژهه‌ڵاتی كوردستان و سكرتێری پێشووی حیزبی دیموكراتی كوردستانی ئێران و هاوڕێیانی له ڤییه‌ن پێته‌ختی وڵاتی ئۆتریش تێپه‌ڕده‌بێت، كۆمه‌ڵگای جیهانی و ڕێكخراوه مافی مرۆڤییه‌كان و ده‌زگا دادپه‌روه‌رییه نێوده‌وڵه‌تییه‌كانی جیهانی چاوی خۆیان له ئاست ده‌رئه‌نجامی دۆسیه‌ی تێرۆری دۆكتۆرر قاسملوو و هاوڕێیانی داخستووه و بێده‌نگی باڵی به سه‌ر ئاكامی تێرۆریستاندا كیشاوه و سه‌رپۆشی له سه‌ر دانراوه.
دوابه‌دوای فه‌رمانی جیهادی خۆمه‌ینی دژی گه‌لی كورد و ده‌ربازبوونی ۱۰ ساڵ شه‌ڕی ده‌سته‌ویه‌خه له ناوچه كوردنشینه‌كانی ڕۆژهه‌ڵاتی كوردستان له نێوان پیشمه‌رگه‌كانی حیزبی دێمۆكراتی كوردستانی ئێران به ڕێبه‌رایه‌تیی شه‌هید دوكتۆر عه‌بدولڕه‌حمان قاسملوو سكرتێری گشتی ئه‌و كاتی حیزب له لایه‌كه‌وه و پاسدار و چه‌كداره‌كانی ڕژیمی كۆماری ئیسلامی ئێران له لایه‌كی دیكه‌وه، بڕیاری وتووێژ و دانووستان له نێوان به‌رپرسانی ڕژیمی كۆماری ئیسلامی و هێزه‌كانی ح
یزبی دێمۆكرات به ڕێبه‌رایه‌تیی دوكتۆر قاسملوو به نێوانجییگه‌ری ڕێزدار جه‌لال تاڵه‌بانی سكرتێری گشتیی یه‌كیه‌تی نیشتمانی كوردستانی باشوور له وڵاتێكی بێ لایه‌نی ئه‌وروپایی هاته ئاراوه و لایه‌نه‌كان دوای چه‌ندین جار دانیشتن و كۆبوونه‌وه به ده‌رئه‌نجامێكی ئه‌وتۆ نه‌گه‌یشتن و له دوایین كۆبۆنه‌وه‌ی هاوبه‌شییان له شاری ڤییه‌ن پێته‌ختی وڵاتی ئۆتریش له ڕێكه‌وتی ۲۲ی پووشپه‌ڕی ساڵی ۱۳۶۸ی هه‌تاوی به‌رانبه‌ر به ۱۳ی جوولای ساڵی ۱۹۶۹ی زایینی دۆكتۆر قاسملووی ڕێبه‌ر هاوڕێ له گه‌ڵ هاوڕێی به‌ڕێز كاك عه‌بدوڵا قادری ئازه‌ر و دۆكتۆر فازیل ڕه‌سووڵ له سه‌ر مێزی وتووێژ له لایه‌ن دیپلۆماته تێرۆریست په‌روه‌ره‌كانی ڕژیمی كۆماری ئیسلامی هاتنه تێرۆر كردن و به داخه‌وه دۆكتۆر قاسملوو و هاوڕێیانی شه‌هید كران و له‌وپه‌ڕی چاوه‌ڕوانیی نه‌كراوی دا بكوژانی دۆكتۆر قاسملوو و هاوڕێیانی دوای چه‌ن ڕۆژ ڕاده‌ستی كۆماری ئیسلامی كرانه‌وه.
له گه‌ڵ ئه‌وه‌ی له ماوه‌ی چه‌ند ساڵی ڕابردوودا دۆسیه‌ی تێرۆری ڕێبه‌ری نیشتمانی ڕۆژهه‌ڵاتی كوردستان و هاوڕێیانی دانه‌خراوه و هێشتا هه‌ر وا كراوه‌یه به‌ڵام تا ئێستاش هیچ ده‌رئه‌نجامێكی ئه‌وتۆی نه‌بووه و تێرۆریستان هه‌ر وا به ئازادی هاتووچۆ ئه‌كه‌ن و ده‌زگای دادپه‌روه‌ری ولاتی ئۆتریش تا ئێستاش هیچ بڕیارێكی گرینگی سه‌باره‌ت به ده‌سبه‌سه‌ر كران و گه‌مارۆ له سه‌ر بكوژان ده‌رنه‌كردووه و به ئاشكرا چاوی خۆی له ئاستی ئه‌و دۆسیه داخستووه و له ئاستی ئه‌و جینایه‌ته دژی مرۆڤایه‌تییه‌ی كۆماری ئیسلامی بێده‌نگی هه‌ڵبژاردووه.
گه‌لۆ بێده‌نگی و چاو داخستنی به‌رپرسانی وڵاته ئه‌وروپییه‌كان و رێكخراوه نێوده‌وڵه‌تییه‌كان بۆ چی ده‌گه‌ڕێته‌وه؟ بۆ پارچه پارچه بوونی كوردستانی نیشتمان! یان فره حیزبی و له‌ت له‌ت بوونی حیزب و ڕێكخراوه‌كانمان؟ له ڕاستییدا كورد له ساڵانی ڕابردوو دا نه‌یتوانیوه ببێته خاوه‌نی به‌ره‌یه‌كی یه‌كگرتوو و هاوبه‌ش له یه‌كیه‌تی ئه‌وروپا و شه‌ڕی كورسی و ده‌سه‌ڵات حیزبه‌كانی كوردستانی له هه‌موو پارچه‌كان له‌ت و په‌ت كردووه و هه‌ر پارچه‌یه‌ك و هه‌ر حیزبێك بۆ خۆی ڕێبه‌رێك و پێشه‌وایه‌كی دیاریكردووه و چاویان له ئاستی یه‌كدی هه‌ڵنایه‌ت و هیچ كام له پارچه‌كان یان حیزبه‌كان ڕێبه‌ری لایه‌نی به‌رانبه‌ریان وه‌كوو ڕێبه‌ر و پێشه‌وای خۆیان یان لانیكه‌م وه‌كوو به‌رپرسێك و شۆڕشگێڕێك قه‌بووڵ نییه و هه‌ر بۆیه‌ش وڵاتانی ڕۆژئاوایی تا ئێستاش یه‌كده‌نگی و هاوپشتی گه‌لی كوردییان نه‌دیووه و بۆیه له به‌رانبه‌ر ساتووسه‌وداكانی كۆماری ئیسلامیی و وه‌رگرتنی چه‌ند به‌رمیل نه‌وت و هه‌ڕه‌شه‌كانی ڕژیمی كۆماری ئیسلامیی بێده‌نگییان له هه‌مبه‌ر دۆسیه‌ی تێرۆری ڕێبه‌ری نه‌ته‌وه‌یی گه‌لی كورد هه‌ڵبژاردووه و حیزبی دێموكرات و به‌رپرسانی به ته‌نیایی تا ئێستا نه‌یانتوانیوه ده‌رئه‌نجامی ده‌زگا دادپه‌روه‌رییه‌كانی ئۆتریش و یه‌كیه‌تی ئه‌وروپا به لای خۆیاندا هه‌ڵبه‌گه‌ڕێننه‌وه و توانای به‌ڕێوه‌بردنی ئه‌و ئه‌ركه‌یان نه‌بووه.
فرۆشتنی چه‌ك و ته‌قه‌مه‌نی به لایه‌نه‌كانی شه‌ڕی ۸ ساڵه‌ی نێوان ڕژیمی كۆماری ئیسلامی ئیران و ڕژیمی به‌عسی عێراق له لایه‌ن وڵاته ڕۆژئاواییه‌كان و له سه‌رووی هه‌موویانه‌وه وڵاتی ئۆتریش، وه‌كوو ئامرازێك بۆ كارتی گوشار به كار هێنرا بۆ وه‌رگرتنه‌وه‌ی دیپلۆمات تێرۆریسته‌كانی ئێران له ژێر ده‌ستی ده‌زگا دادپه‌روه‌رییه‌كانی وڵاتی نه‌مسا و دادگای مافی مرۆڤی یه‌كیه‌تی ئه‌وروپا و له ڕاستییدا بكوژانی ڕێبه‌ری كورد و هاوڕێیانی به ئێسكۆرته‌وه به‌ره‌و تاران ڕه‌وانه كرانه‌وه و سه‌رپۆش له سه‌ر دوسیه‌ی تێرۆری دوكتۆر قاسملوو و هاوڕێیانی دانرا و له لایه‌كی دیكه‌ش وه‌كوو باس كرا نه‌بوونی لۆبییه‌كی یه‌كگرتووی كورد ڕه‌وتی به‌ره‌و پێش چوونی دوسیه‌كه به ئاقارێكی دوابه‌دوا دا كێشا و ڕێكخراوه مافی مرۆڤییه‌كان و ناوه‌نده لێكۆڵینه‌وه نێوده‌وڵه‌تییه‌كانیش گوێی خۆیان لی خه‌واند و دوای تێپه‌ڕبوونی ۳۱ ساڵ به سه‌ر ئه‌و جینایه‌ته دژی مرۆڤایه‌تییه‌دا بكوژان و تێرۆریستانی كۆماری ئیسلامی و به‌رپرسانی ئه‌و ڕژیمه دیكتاتۆره هیشتا به‌رده‌وامن له درێژه پێدان به تێرۆری نێوده‌وڵه‌تیی و هه‌نارده كردنی تێرۆر بۆ هه‌موو جیهان به گشتی و ڕۆژهه‌ڵاتی ناوین به تایبه‌تی.
دوای كه‌متر له ساڵێك ده‌زگای تیرۆری ڕژیمی كۆنه‌په‌ره‌ستی ئێران جارێكی دیكه ده‌ستی به خوێنی ڕێبه‌رێكی دیكه‌ی گه‌لی كورد، دوكتۆر سادق شه‌ره‌فكه‌ندی و هاوڕێیانی سوور كرد و ئه‌مجاره له شوێنی نانخواردن و له رێستوورانتێك به ناوی میكۆنۆس له وڵاتی ئاڵمان دوكتۆر شه‌ره‌فكه‌ندی و هاوڕێیانی كرانه ئامانج و زۆر بێڕه‌حمانه شه‌هید كران و كۆماری ئیسلامی په‌ڕه‌یه‌كی ڕه‌شی دیكه‌ی بۆ خۆی و ڕژیمه‌كه‌ی تۆمار كرد و جارێكی دیكه بۆ هه‌موو جیهانی ئاشكرا كرد كه دژی دێمۆكراسی و ئازادی و مافی چاره‌نووسی گه‌لان و نه‌ته‌وه‌كانه‌ی وڵاته‌كه‌یه‌تی وڵاتێك كه به ناحه‌ق خۆی به سه‌ر نه‌ته‌وه‌كانی دانیشتووی هه‌موو ناوچه‌كانی دا زاڵ كردووه و بووه به خاوه‌نی ژێرخانی ئابووری و مافی چاره‌نووسی ئه‌و نه‌ته‌وانه و به‌رده‌وامه له چه‌وساندنه‌وه‌یان ولێك به‌ردان و درووست كردنی شه‌ڕ و ئاڵۆزی له نێوانیان دا به بیانووی جیاخوازی و پارچه‌پارچه‌كردن و دابه‌ش كردنی خاكی وڵاتێكی وه‌همی به ناوی ئێران.
له ئێستادا پێكهێنانی به‌ره‌یه‌كی ڕاسته‌قینه بۆ وه‌دیهینانی مافه ڕه‌واكانی نه‌ته‌وه‌كه‌مان و ده‌ربازبوون له سنووره‌كانی چه‌وساندنه‌وه زیاتر له پێشوو هه‌ستی پێ ده‌كرێت و پێویسته به‌ڵام مخابن فره حیزبی و شه‌ڕی ئاڵا و شه‌ڕی ئایدیۆلۆژیا یاڵی به سه‌ر هه‌موو پارچه‌كانی نیشتمانه‌كه‌ماندا كێشاوه و ده‌ربازبوون له قه‌یرانی كورسی و ده‌سه‌ڵات په‌ره‌ستی و هه‌نگاو هه‌ڵهێنان به‌ره‌و پێكھینانی ئامانجێكی هاوبه‌ش و یه‌كگرتوو زۆری ماوه و زه‌حمه‌ته.
با له بیر نه‌كرێت داواكاری دوكتۆر قاسملوو له به‌رپرسانی ڕژیمی تیرۆریستی كۆماری ئیسلامی ته‌نیا به فه‌رمیی ناسینی سنووره‌كانی كوردستان و مافی دابین كردنی چاره‌نووسی نه‌ته‌وه‌ی كورد و خوێندن به زمانی دایكی له سنووره‌كانی كوردستان بوو كه به داخه‌وه شه‌مشه كوێره‌كانی ڕژیمی و دوژمنانی ئازادی چاویان له ئاست به‌خته‌وه‌ری نه‌ته‌وه‌ی كورد و ئاوابوونی خاكی كوردستان هه‌ڵنه‌هات و له كاتی وتووێژ و دانووستان و به پێی به‌رنامه‌یه‌كی له پێشدا داڕێژراو ڕیبه‌ری نه‌ته‌وه‌یی گه‌لی كورد و سكرتێری گشتیی حیزبی دێموكرات و هاوڕێیانی زۆر بێ به‌زه‌ییانه كه‌وتنه به‌ر ئاگری غه‌زه‌بیان و به گولله‌ی ڕق و كینه‌ی ڕژیم تێرۆر و شه‌هید كران. به‌ڵام ناوی دوكتۆر قاسملوو وه‌كوو ناوی پێشه‌وا قازی مۆحه‌ممه‌د و وه‌كوو ناوی سمكۆی نه‌مر به نه‌مری مایه‌وه و ته‌نیا ڕووڕه‌شی و په‌ڵه‌یه‌كی ره‌شی دیكه خرایه سه‌ر كارنامه‌ی چه‌په‌ڵی كاربه‌ده‌ستانی كۆماری په‌ت و سێداره و تا ئێستاش ترس له ئه‌ویندارانی قاسملوو و هاوڕێیانی خه‌ونی له چاویان حه‌رام كردووه و تا ئێستاش شۆڕشگێڕان و تێكۆشه‌رانی حیزبی دێموكرات ئێعدام و تیرۆر ده‌كرێن. ئه‌مه له كاتیكدایه نه‌مامی ئازادی كه له لایه‌ن دوكتۆر قاسملوو و ڕێبه‌رانی نه‌ته‌وه‌یی دیكه‌وه چیندرا ساڵ له گه‌ڵ ساڵ باڵا ده‌كات و گه‌وره‌تر و ئه‌سنوورتر ده‌بێت و هه‌ستی نه‌ته‌وه‌یی لاوان و تیكۆشه‌رانی وڵاته‌كه‌مان نه‌وه له دوای نه‌وه زیاتر باڵا ده‌كات و به هێزتر ده‌بێت.
هه‌موو ساڵێك وه‌كوو نه‌ریتێك له لایه‌ن كوردستانیانی دانیشتووی ناوخۆ و ده‌ره‌وه‌ی وڵات یادی شه‌هیدان كرانی دوكتۆر قاسملوو به‌رز و به‌ڕێز ڕاده‌گیرێت و بكوژان و ڕژیمی تێرۆریست په‌روه‌ری كۆماری ئیسلامی ئێران له ئاستی نێوده‌وڵه‌تیی و هه‌موو جیهاندا شه‌رمه‌زار ده‌كرێت و له لایه‌ن كوردستانیانه‌وه له گه‌ڵ ڕیبه‌رانی نه‌ته‌وه‌یی گه‌لی كورد و له سه‌رووی هه‌موویانه‌وه شه‌هید قاسملووی نه‌مر په‌یمان نوێده‌كرێته‌وه و وه‌فاداری به به‌ڵێنه‌كان دووپات ده‌كرێنه‌وه. ڕێبه‌رێك كه دوای تێپه‌ڕبوونی ۳۱ ساڵ له شه‌هید كرانی و ڕژانی به ناحه‌قی خوێنی هیشتا ناوی و رێبازی زیندووه و ڕێنمایی و وته و نووسراوه و لێكۆڵینه‌وه‌كانی ئیستاش له زۆربه‌ی زانكۆ ڕۆژئاواییه‌كان وه‌كوو وانه‌یه‌ك له زانكۆكان ده‌وترێنه‌وه و دووپات ده‌كرێنه‌وه و هێشتا كۆن نه‌بوون و نوێیه و بگره رۆژ له دوای ڕۆژ زیاتر له گه‌ل بارودۆخه‌كه‌دا گونجاو ده‌بن و ده‌گونجێن.
دوكتۆر قاسملوو له كتێب و نووسراوه‌كانی وه‌كوو كوردستان و كورد به وردی ئابووری كوردستان و ناوچه كوردنشینه‌كانی هه‌موو كوردستان ئه‌خاته ژێر لێكۆڵینه‌وه‌ی ورد و له كورته‌باس دا به پێشكه‌ش كردنی سیسته‌می سۆسیالیزمی دێمۆكراتیك بۆ كۆمه‌ڵگای داهاتووی كوردستان و هه‌ڵسه‌نگاندنی سۆسیالیزمی به‌رده‌ست و چاكه و خراپه‌كانی ناوی خۆی بۆ هه‌تا هه‌تایه له مێژووی كورد تۆمار كردووه و خزمه‌تێكی به‌رچاوی به بزاڤی نه‌ته‌وه‌یی و ڕزگاریخوازانه‌ی گه‌لی كورد پێشكه‌ش كردووه و تا ئێستاش ڕێگای به‌رده‌وامه و ڕێبوارانی هه‌ر چه‌ن به‌ر بڵاو و پارچه پارچه‌كراو به‌ڵام هێشتا درێژه‌ده‌ری ڕیگا و بیر و بڕواكانی و هه‌وڵ ئه‌ده‌ن بۆ زیندوو ڕاگرتنی یاد و بیرۆكه و ئه‌ندیشه‌كانی بۆ نه‌وه‌كانی داهاتووی نه‌ته‌وه‌كه‌مان.
ده قى نوستراوه که به فۆرمه تى پى دی اف دابه زینه:
سێهه‌مین ساڵیادی كۆچی دوایی میدیاكار و ڕۆژنامه‌نووسی ڕۆژهه‌لاتی كوردستان سۆران سه‌قزی
سێهه‌مین ساڵیادی كۆچی دوایی میدیاكار و ڕۆژنامه‌نووسی ڕۆژهه‌لاتی كوردستان سۆران سه‌قزی
ئاماده‌كردنی : ئه‌مین خه‌واله 
ڕۆژنامه‌نووس و هه‌واڵنێر
٧ی مانگى مه ى ٢٠٢٠
ماوه‌ی ۳ ساڵ به‌ر له ئێستا و له وه‌ها ڕۆژێكدا سۆران سه‌قزی میدیاكار و رۆژنامه‌وان و چالاكیی سیاسی له هه‌ولێری پیته‌ختی هه‌رێمی كوردستان له ڕووداوێكی گوماناویدا گیانی به كوردستان به‌خشی و بۆ هه‌میشه ماڵئاوایی له نیشتمان و بنه‌ماڵه و كۆڕی هاوڕێیانی كرد.
خه‌بات شافێعی ناسراو به سۆران سه‌قزی كۆڕی شه‌هید په‌رویز شافێعی ساڵی ۱۳۵۷ی هه‌تاوی له شاری سه‌قز سه‌ر به ڕۆژهه‌ڵاتی كوردستان له بنه‌ماڵه‌یه‌كی كوردپه‌روه‌ر و نیشتمانپه‌روه‌ر چاوی به دونیا هه‌ڵهێنا و هه‌ر له ته‌مه‌نی زۆر منداڵی باوكی له ڕیگای نیشتمان گیانی به‌خشی و شه‌هید كرا و خه‌بات له په‌نا ده‌ستی دایكی باڵای كرد و گه‌وره بوو. دایكێك كه به ڕاستی نموونه‌ی واڵای مرۆڤایه‌تیی و مێهره‌بانی و فیداكارییه و هه‌موو ژیانی خۆی له پێناو په‌روه‌رده كردن و پێگه‌یاندنی ڕۆڵه تاقانه‌كه‌ی دانا.
له گه‌ڵ باڵا كردن و گه‌وره بوون خه‌بات شافیعی به هۆی هه‌ستی نیشتمانپه‌روه‌ری و ڕابردووی بنه‌ماڵه‌كه‌ی و به هۆی گوشاره‌كانی ناوه‌نده ئه‌منییه‌تییه‌كانی رژیمی ئێران ناچار ڕۆژهه‌ڵاتی كوردستانی به جێهێشت و ڕووی كرده هه‌نده‌ران و له وڵاتی سوئید درێژه‌ی به چالاكییه سیاسی و نیشتمانپه‌روه‌رانه‌كه‌ی دا و وه‌كوو ئه‌ندامێكی چالاكی حیزبی دێموكراتی كوردستانی ئێران تا دوایین ڕۆژه‌كانی ته‌مه‌ن وه‌فادار بوو به ڕیبازی ڕێبه‌رانی شه‌هید قازی و قاسملوو و شه‌ره‌فكه‌ندی و دریژه‌ده‌ری ڕیگایان بوو.
له گه‌ڵ دامه‌زراندن و ده‌ستبه‌كاربونی ته‌له‌ڤیزیۆنی تیشك تی ڤی وه‌كوو یه‌كێك له ئه‌ندامانی چالاكی ئه‌و ناوه‌نده به‌رنامه‌ی لاوان و چه‌ندین پڕۆگرامی دیكه‌ی پیشكه‌ش كرد جێگای ئاماژه پیكردنه ناوبراو پیشتر وه‌كوو ئه‌ندامی یه‌كیه‌تی لاوانی حیزبی دیموكرات له ولاتی سوئید پیشكه‌شكاری ڕادیۆ لاوان بوو له وڵاته و به‌رده‌وام بوو له چالاكییه‌كانی. ساڵی ۲۰۰۷ی زایینی ماڵپه‌ڕی ناوه‌ندی هه‌واڵنێری سه‌قزی دامه‌زراند و ماوه‌ی چه‌ند ساڵ له به‌شی هه‌واڵ و ئێدیت و به‌ڕیوه‌به‌رایه‌تیی ناوه‌نده‌كه هاوڕی له گه‌ڵ كۆمه‌ڵێك ڕۆژنامه‌نووسی چالاك له ناوخۆ و ده‌ره‌وه‌ی وڵات چالاك بوو تا ئه‌وه‌ی ئه‌و ناوه‌نده له لایه‌ن هێزه ئه‌منیه‌تییه‌كانه‌وه بۆ هه‌میشه داخرا.
سۆران سه‌قزی پێشكه‌شكار و میدیاكار به‌شداری چه‌ندین پڕۆگرام و چالاكی ڕاگه‌یاتدنی دیكه بوو له ناوه‌نده ڕاگه‌یاندنه نه‌ته‌وه‌ییه‌كان و له هه‌موویان به‌رچاو و به ڕیژه‌یه‌كی زۆری بینه‌ر پڕۆگرامی سه‌یر و سه‌فه‌ر بوو كه وه‌كوو پێشكه‌شكار كولتوور و فه‌رهه‌نگی هه‌موو نه‌ته‌وه‌كان و وڵاتانی دوور و نزیكی پێشكه‌ش به بینه‌رانی كرد و خزمه‌تێكی به‌رچاو و شایانی باسكردنی به میدیا و هۆنه‌ری كوردی كرد. سۆران سه‌قزی قسه‌خۆش و نیشتمانپه‌روه‌ر تا دوایین ساته‌كانی ته‌مه‌ن وه‌فادار بوو به به‌ها مرۆڤایه‌تییه‌كان و ڕێبازی ڕیبه‌رانی نیشتمان و نه‌ته‌وه‌ی كورد و هه‌موو ئه‌رك و توانای خۆی دابینكرد بۆ خزمه‌ت به گه‌ڵ و نه‌ته‌وه‌كه‌ی و تا دوا پشوو هه‌دای نه‌دا.
زۆر به داخه‌وه سێ ساڵ به‌ر له ئێستا و له وه‌ها ڕۆژێك دا له ڕێكه‌وتی ۱۸ی گوڵان به‌رانبه‌ر به ۷ی ئایار له ڕووداویكی دڵته‌زین و گۆماناوی گیانی به نیشتمانی به‌خشی و له پارچه‌یه‌كی نیشتمان شه‌هید كرا و له مه‌زاری شه‌هیدانی حیزبی دیموكراتی كوردستانی ئێران له نزیك شاری هه‌ولێر گیانی پاكی به خاكی پارچه‌یه‌كی نیشتمان ئه‌سپارده‌كرا و دڵه گه‌وره‌كه‌ی بۆ هه‌میشه له لێدان كه‌وت و ڕۆحی له په‌نای ڕۆحی شه‌هیدانی نیشتمان و له سه‌رووی هه‌موویانه‌وه باوكی شه‌هیدییه‌وه ئۆقره‌ی گرت. یادی پیرۆزی هه‌رمان و ناوی به‌رز و به‌ڕیز و رۆحی هه‌تا هه‌تایه شاد بێت.
